أعتقد حوالى 80% من مشاكل المخطوبين أو المرتبطين فى مصر سببها الرئيسى حالة الفراغ الرهيبة اللى عند البنت المصرية ! ... انعدام الحريات أو الهوايات عند البنت المصرية عادة ... و كونها غالباً مش بتشتغل لو متخرجة، بيخلى عندها مساحة فراغ كبيرة جداً فاضية فى حياتها ... و بمجرد ما بيحصل ارتباط بتبقى متخيلة ان الطرف الأخر عنده نفس المساحة الفاضية بالظبط ... و ممكن يقوم بدور الحبيب ... و المغنى ... و المسلسل التركى ... و مجلة الموضة ... و عالم الأبراج ... و صاحبتها اللى بترغى معاها يومياً ساعتين فى التليفون ... الخ !
أنا اشتغلت مع أجانب كتير و عمرى ما شفت منظومة تليفون كل ساعتين و مسج كل دقيقتين دى الا فى مصر ! ... المصرى لما بيرتبط بيبقى كتب شيك على بياض على نفسه، انه فاضى طول الوقت ! ... لو رد و عايز يقفل يبقى لازم يوضح لية مستعجل ... لو مردش، يبقى لازم يبرر بعدها لية مردش ... لو كنسل، يبقى لازم يوضح لية متصلش لما الظروف سمحت ... لو متصلش بسرعة، يبقى مش مهتم ... لو مشعارف اية يبقى اية ! ... و يا سلام بقى لو ممكن نعمل شوية دراما ! ... اصل انت قلت *** ... لا انت عملت ***... مش المفروض كنت *** ... طب لية ما*** ... كان لازم *** ... !
بروجرام خنيق لا ينتهى من الملل، سببه الوحيد غالباً ان فيه واحد يومه مش مكفيه يعمل اللى لازم يعمله و محتاج يعمله ... و واحدة يومها زايد عليها و مش لاقية أى حاجة تعملها !
العلاقات العاطفية مش هتوصل لمرحلة نضج فى مصر غير لما يبقى الطرفين بيعيشوا الحياة زى بعض ... لما تبقى البنت بتبنى حياة الاول و بعدين بتختار من الحياة دى الشخص اللى يناسبها ... لما يبقى فى حياتها (الشغل و الهواية و الرياضة و الاصحاب ... الخ الاهتمامات) ... و بعدها يبقى فيه شريك الحياة ... لما هى تفهم ان احتياجها لكل ما سبق (مسألة ضرورية) ... وهو يفهم ان احتياجها لكل ما سبق (مسألة ضرورية) ... والعُرف العام للمجتمع يستوعب ان احتياجها لكل ما سبق (مسألة ضرورية) ... لكن طول ما الحياة فى نظرها و نظر المجتمع بتبتدى وتنتهى بعريس، هتفضل المنظومة الطفولية السخيفة دى بكل مشاكلها زى ما هى.